الشاعر عبد الله بن سعد بن عمار

((...الشاعر عبد الله بن سعد بن عمار..))

البارحه سهرن ودمعي يــهلي

كني صويب مستسمن صــوابه

متذكرن عقب الــبطا ديرة لي

ثادق سقا الله سهلته مع هـضابــه

أحب ثـادق من محبة هل لي

جدانـي الـلي دفنوا في ترابـــه

وأمي وأبوي وعمي وعـمة لي

ومن لي قريب كل بثادق شبابـــه

ياطال ما هو ياسـعد منزل لي

عيـشه لذيذ ومشرب من شرابـــه

ياسـعد عين اللي نزل ديرة لي

ويا سعد عين اللي يشوف الغرابــه

الــلي نزل في ديرتي ما يملي

لوه غريب كـنهـم لـه قرابـــه

اولاد زايد بين غرس مـضلي

رجالهم درب الـضفر ما يهـــابه

وحلا لهم في كل ريـع يــفلي

والحرب الى جت حزته هم حرابـه

وجيرانهم ضربة سيوف تسلـي

لاجا لزومه فاجرده من جرابــــه

انشد هل التاريخ وهل السجلـي

وانشد هل المحمل ذياب الذيــــابه

ماني من اللي في كلامه يزلـي

أقول عن هاك الــسلف بالنــيابـه

اقــول عنــهم والدلايل تدلي

وابن عويدي قـــبل ما جبت جابـه

يوم الجبالي للبيارق يفــــلي

والغزو في ســـاقة ذلوله دبــابه

وعبدالعزيز إلى عـدوه يولــى

دايــم ركايبنا تبــاري ركابـــه

وعن يمينه بالشلل ما تشلي

ويرحمه رب ما بعد صك بابه